කුරුදු වලින් ඩොලර් මිලියන 500ක ආදායමක් උපයා ගැනීමේ සැලසුමක්

මෙරට ප්‍රධානතම අපනයන කෘෂි භෝගයක් වන කුරුඳු වගාව මගින් වසරකට ඇමරිකානු ඩොලර් මිලියන 500ක ආදායමක් උපයා ගැනීමට සැලසුම් කර ඇති බව කුරුඳු සංවර්ධන දෙපාර්තමේන්තුව සඳහන් කරනවා.

කුරුඳු සංවර්ධන දෙපාර්තමේන්තුවේ අධ්‍යක්ෂ ජනරාල් ජනක ලින්දර මහතා පවසා සිටියේ, දැනට කුරුඳු අපනයනය තුළින් ලංකාවට වසරකට ඩොලර් මිලියන 250ක පමණ විදේශ විනිමයක් උපයා ගන්නා බවයි.

එම ආදායම දෙගුණයක් කිරීම සඳහා සැලසුම් සකස්කර ඇති හෙතෙම පැවසීය‍.

ලංකාවේ කුරුඳු නිෂ්පාදනය වසරක මෙට්‍රික් ටොන් 25,000ක් පමණ වන අතර, ඉන් මෙට්‍රික් ටොන් 19,000කට ආසන්න ප්‍රමාණයක් අපනයනය කරනු ලබනවා.

සාම්ප්‍රදායිකව කුරුඳු වගාකර තිබෙන ගාල්ල, මාතර හම්බන්තොට ප්‍රදේශවලට අමතරව කුරුණෑගල, පුත්තලම හා මහවැලි කලාප වැනි ප්‍රදේශවල කුරුඳු වගාව ව්‍යාප්ත කිරීමට කුරුඳු සංවර්ධන දෙපාර්තමේන්තුව සැලසුම් සකසා ඇත.

චීනය සමග මේ වනවිට කුරුඳු අපනයනය සම්බන්ධයෙන් අවබෝධතා ගිවිසුමක් අත්සන් කර ඇති බවයි ඒ මහතා වැඩිදුරටත් පවසා සිටියේ.

එහි ප්‍රතිඵලයක් ලෙස 2025 ජනවාරි මස සිට චීනයට ද කුරුඳු අපනයනය කිරීමට අවස්ථාව හිමිවන බව ඔහු පැවසීය.

මීට අමතරව යුරෝපා සංගමය ඇතුළු රටවලටද කුරුඳු අපනයනය වැඩිකිරීමට කුරුඳු සංවර්ධන දෙපාර්තමේන්තුව බලාපොරොත්තු වනවා.