මෙවර අධ්යාපන පොදු සහතික පත්ර සාමාන්ය පෙළ විභාගයේ ප්රතිඵල මත පදනම්ව උසස් පෙළ හැදෑරීමට අපේක්ෂාවෙන් සිටින ශිෂ්ය ශිෂ්යාවන් සඳහා ජනාධිපති අරමුදල මඟින් ශිෂ්යත්ව ලබාදීමේ වැඩසටහන ආරම්භ කිරීමට ජනාධිපති රනිල් වික්රමසිංහ මහතා උපදෙස් දී තිබෙනවා.
දිවයිනේ අධ්යාපන කලාප 100ම ආවරණය වන පරිදි එක් කලාපයකින් සිසුන් 50ක් බැගින් තෝරාගෙන, සිසුන් 5,000ක් සඳහා මසකට රුපියල් 6,000 බැගින් වන ශිෂ්යත්ව ලබාදීම මෙහි දී සිදු කෙරෙනු ලබනවා.
2022(2023) වර්ෂයේ දී අ.පො.ස (සා.පෙළ) විභාගයට පළමුවරට පෙනී සිට, විභාගය සමත්ව උසස් පෙළ හැදෑරීමට සුදුසුකම් ලබා තිබීම, රජයේ පාසලක හෝ ගාස්තු අය නොකරන පෞද්ගලික පාසලක ඉගෙනුම ලබන ශිෂ්යයෙකු /ශිෂ්යාවක වීම, ඉල්ලුම්කරුගේ පවුලේ මාසික ආදායම රුපියල් 100,000ක් නොඉක්මවීම මෙම ශිෂ්යත්ව සඳහා ඉල්ලුම් කිරීමට මූලික සුදුසුකම් ලෙස සැලකෙනවා.
මෙම ශිෂ්යත්ව වැඩසටහන සඳහා වන අයදුම්පත්රය සහ ඊට අදාළ විස්තර, ජනාධිපති ලේකම් කාර්යාලයේ presidentsoffice.gov.lk, ජනාධිපති අරමුදලේ presidentsfund.gov.lk සහ ජනාධිපති මාධ්ය අංශයේ pmd.gov.lk වෙබ් අඩවිවලට පිවිසීමෙන් බාගත කර ගත හැක.
එම අයදුම්පත් නිසි පරිදි සම්පූර්ණ කිරීමෙන් අනතුරුව අදාළ සිසුන් විසින් ඔවුන් සාමාන්ය පෙළ විභාගයට පෙනී සිටි පාසලේ විදුහල්පතිවරයා වෙත එම අයදුම්පත් භාරදීමට කටයුතු කළ යුතු වෙනවා.

