ජල සම්පාදන හා ජලාපවාහන මණ්ඩලයේ තිරසරභාවය පවත්වාගෙන යාම සඳහා ජල ගාස්තු සඳහා සූත්රයක් අවශ්ය බවත් එම සූත්රය සැකසීම පිළිබඳ සාකච්ඡා සිදු කෙරෙමින් පවතින බව ජල සම්පාදන සහ වතු යටිතල පහසුකම් සංවර්ධන අමාත්ය ජීවන් තොණ්ඩමන් මහතා පවසනවා.
යෝජිත ජල ගාස්තු සූත්රයේ අවසන් කෙටුම්පත දෙසැම්බර් මාසයේදී සකස් කර අවසන් කිරීමට අපේක්ෂා කරන බවත් එමඟින් පුණ්ය ආයතන, රෝහල් සහ පාසල් සඳහා සාධාරණ මිල ගණන් යටතේ ජල සැපයුම සහතික කරන බවත් අමාත්යවරයා අවධාරණය කර තිබෙනවා.
එසේම වාණිජ ආයතන සඳහා ජල ගාස්තු සූත්රය බලපාන ආකාරය පිළිබඳ ආයෝජන ප්රවර්ධන රාජ්ය අමාත්ය දිලුම් අමුණුගම සහ මුදල් රාජ්ය අමාත්ය ෂෙහාන් සේමසිංහ යන අමාත්යවරුන් හමුවී සාකච්ඡා කිරීමට සැලසුම් කර තිබෙන බව ද හෙතෙම සඳහන් කරනවා.
මේ අතර අමාත්යවරයා අවධාරණය කරන්නේ ජලයේ ගුණාත්මකභාවය රැකගැනීම සහ පිරිවැය අඩු කිරීම සඳහා රාජ්ය-පෞද්ගලික හවුල්කාරිත්වයක් ඇති කිරීමට රජය සැලසුම් කර ඇති නමුත් ජලය විකිණීමට හෝ පෞද්ගලීකරණය කිරීමට කිසිඳු අදහසක් නොමැති බවයි.

