බැංකු ගිණුම විවෘත කර ප්රමාදයකින් තොරව ප්රතිලාභ හිමි කර ගන්නා ලෙස අස්වැසුම ප්රතිලාභීන්ට දැනුම් දෙමින් ජනාධිපති මාධ්ය අංශය විසින් නිවේදනයක් නිකුත් කර තිබෙනවා.
එහි දැක්වෙන්නේ අස්වැසුම වැඩසටහන පිළිබඳව සුබසාධක ප්රතිලාභ මණ්ඩලය ඇතුළු අදාළ පාර්ශව සමඟ පසුගිය දා ජනාධිපති කාර්යාලයේදී පැවති සාකච්ඡාවකදී එහි සභාපති ජයන්ත විජේරත්න මහතා මේ බව දැනුම් දී ඇති බවයි.
ඒ අනුව අස්වැසුම සුබසාධක ප්රතිලාභ ගෙවීමේ වැඩසටහන සඳහා සුදුසුකම් ලබා ප්රදේශීය ලේකම් කාර්යාලයන්හි ප්රදර්ශනය කළ නාම ලේඛනයේ නම් ඇතුළත් වූ නමුත්, මෙතෙක් ප්රතිලාභ ලබා ගැනීම සඳහා බැංකු ගිණුම් විවෘත නොකළ සියලු ප්රතිලාභීන් හැකි ඉක්මණින් තම බැංකු ගිණුම විවෘත කර ප්රමාදයකින් තොරව ප්රතිලාභ හිමි කර ගැනීමට කටයුතු කරන ලෙසට ඔහු සඳහන් කර තිබෙනවා.
අදාළ ප්රාදේශීය ලේකම් කාර්යාලයේ අස්වැසුම පරිගණක පද්ධතියෙන් නිකුත් කරනු ලබන ලිපිය ඉදිරිපත් කර තම ප්රදේශයේ ලංකා බැංකුව, මහජන බැංකුව, ජාතික ඉතිරි කිරීමේ බැංකුව සහ ප්රාදේශීය සංවර්ධන බැංකුව යන ඕනෑම බැංකු ශාඛාවකින් අස්වැසුම ප්රතිලාභීන්ට තම බැංකු ගිණුම විවෘත කිරීමේ හැකියාව පවතී.
අනතුරුව එම ගිණුම් විස්තර අදාළ බැංකුව විසින් සුබ සාධක ප්රතිලාභ මණ්ඩලය වෙත යොමු කරනු ලැබේ.
එසේම ජාතික හැඳුනුම්පත් නොමැති වීම හේතුවෙන් බැංකු ගිණුම් විවෘත කිරීමට නොහැකි අස්වැසුම අයදුම්කරුවන්ට මාස 06ක් තුළ ජාතික හැඳුනුම් පත් ඉදිරිපත් කිරීමේ කොන්දේසිය මත ගිණුම් විවෘත කිරීමේ අවස්ථාව ලංකා බැංකුව, ජාතික ඉතිරි කිරීමේ බැංකුව සහ ප්රාදේශීය සංවර්ධන බැකුව විසින් ලබා දී තිබෙනවා.

