කැවිලි මේසේ අඩුව පුරවන කොණ්ඩ කැවුම්

සිංහල හා දෙමල අලුත් අවුරුද්ද ලබන්න එන්න එන්නම ලං වෙනවා. ඉතින් අවුරුදු කැවිලි මේසයට නැතුවම බැරි අංගයක් තමයි මේ කොණ්ඩා කැවුම් කියන්නේ.

අපි බලමු කොණ්ඩා කැවුම් කොහොමද හදා ගන්නේ කියලා.

අවශ්‍ය දෑ

කැකුළු හාල් ග්‍රෑම් 500 ක්

පාන් පිටි ග්‍රෑම් 250 ක්

කිතුල් පැණි බෝතලයක්

කරදමුංගු හෝ මාදුරු ස්වල්පයක් (කැමති නම් පමණක්)

ලුණු කුඩු

පිරිසුදු පොල්තෙල්

පිළියෙල කරන අන්දම

කැවුම් හදන්න අවශ්‍ය හාල්පිටි නිවෙසේදී ම කොටා ගැනීම වැදගත්. වෙළෙඳපොළේ ඇති හාල්පිටි නියමිත ප්‍රමාණයෙන් පොඟවා ඇත්දැයි සෑහීමකට පත්වෙන්න බැහැ. සමහර පිටි පිළුණු ගතියෙන් යුතුවන අවස්ථාත් තිබෙනවා.

කැකුළු හාල් ග්‍රෑම් 500 ක් හොඳින් සෝදා පැය 2 – 3 ක් පෙඟෙන්න තබන්න. ඉන්පසු වතුර පෙරා දිය ගතිය සිඳුණු පසු බ්ලෙන්ඩරයේ හෝ වංගෙඩියක දමා කොටා පෙනේරයකින් හළා ගන්න.

පිටි මිශ්‍රණය සැකසීමේ දී හාල් පිටි සහ පාන්පිටි එකට දමා හලාගෙන වෙනම පැණි ටික උණුකරගෙන මඳ උණුසුමෙන් පිටි මිශ්‍රණයෙන් ටික ටික දමමින් හැන්දකින් මිශ්‍ර කරන්න. මෙයට ලුණු කුඩු, කරදමුංගු කුඩු හෝ මාදුරු කුඩු එකතු කරන්න.

අනාගත් පිටි මිශ්‍රණය වැඩිපුර දියාරු හෝ උකුගතියෙන් තිබෙන්නට බැහැ. පැණි ප්‍රමාණය මදි නම් උණු වතුර ටිකක් එකතු කර පිටි මිශ්‍රණය අනාගන්නට පුළුවනි. කැට ගතියට තිබෙන්නට බැහැ. දැන් මේ පිටි මිශ්‍රණය පැය 2 – 3 ක් පිපෙන්නට වසා තබන්න.

කැවුම් බදින්නට හොඳ පිරිසුදු පොල් තෙල් තෝරා ගන්න. සාමාන්‍ය ප්‍රමාණයේ තාච්චියේ ¼ ක ප්‍රමාණයට තෙල් දමා රත්වෙන්න හරින්න. බොකුටු හැන්දක් ගෙන පිටි මිශ්‍රණයෙන් කොටසක් රත්වූ තෙලට දමන්න. ඒ ප්‍රමාණය පැතැලි වූ පසු ඒ මතට හෙමින් හෙමින් පිටි හැන්දෙන් වත් කරන්න. දැන් පිටි දැමීම නවතා ස්වල්ප වේලාවකින් උඩට මතු වූ කොටස ඉරටුවකින් හෝ කූරක් ගසා අනෙක් අතින් තෙල් හැන්දෙන් තෙල් ඉසිමින් කූර තුළින් කොණ්ඩය උඩට මතු කරගෙන අනෙක් පස හරවා රවුම් කරමින් බැදෙන්න හරින්න. අපූරුවට කොණ්ඩය මතු වුණු කැවුමක් නිර්මාණය කරගන්න පුළුවන්.

විශේෂ කරුණු

දිනක් දෙකක් ගත වෙද්දී කැවුම් ගල්වගේ් හයිවෙන්නේ සීනි එකතු කර කැවුම් හැදීමෙන්. පිරිසුදු කිතුල් පැණි හෝ පොල් පැණි එකතු කිරීමෙන් එසේ නොවේවි.

සමහර කැවුම්වල මැද අමු ගතියක් ඇතිවෙන්නේ කැවුම්වල මැදට මනාව උෂ්ණත්වය නොලැබී යෑම නිසා. වැඩිපුර පිටි වැඩිපුර ගින්දර දැමීමෙන් කැවුම් කර කරගන්න එපා. කොණ්ඩය මතු කරගත්තාට පසුව කැවුම පෙරළා හොඳින් තම්බා ගැනීමෙන් මැද අමුගතිය බොහෝ දුරට අඩුකර ගන්නට පුළුවන්.