වැටුප් ව්යුහය සංශෝධනය කරමින්, රාජ්ය අංශයේ වැටුප් සංශෝධනයට 2025 අයවැයෙන් රජය යෝජනා කර තිබේ.
ඒ අනුව රාජ්ය අංශයේ අවම මුලික වැටුප රු 24,250 සිට රු 40,000ක් දක්වා රු 15,750කින් වැඩි කිරීමට තීරණය කර තිබෙනවා.
එසේම දැනට පවතින තාවකාලික අතුරු දීමනාව සහ විශේෂ දීමනාව මුලික වැටුපට ඒකාබද්ධ කරන අතර රු 8,250ක ශුද්ධ වැඩිවීමක් මුලික අවම වැටුපට අදාළ සිදුකිරීමට ද යෝජනා කර ඇති බවයි අයවැය ඉදිරිපත් කරමින් ජනාධිපතිවරයා සඳහන් කළේ.
මීට සමගාමීව අධිකරණ සේවා, රාජ්ය සංස්ථා, ව්යස්ථාපිත මණ්ඩල, විශ්වවිද්යාල කාර්ය මණ්ඩල සහ ත්රිවිධ හමුදා නිලධාරීන්ගේ වැටුප් ද වැඩි කිරීමට නියමිතයි.
රු 15,750කින් අවම වැටුප වැඩිකිරීමට අමතරව, වාර්ෂික වැටුප් වර්ධකයේ වටිනාකම 80%කින් වැඩි කර තිබෙනවා.
ඒ අනුව රු 250ක අවම වාර්ෂික වැටුප් වර්ධකය රු 450 දක්වා සහ රු 500ක වැටුප් වර්ධකය රු 900 දක්වා ඉහළ යනු ඇත.
මෙම වැටුප් වැඩිකිරීමේ සමස්ත ඇස්තමේන්තුව වියදම රු බිලියන 325ක් වනු ඇතැයි අපේක්ෂා කෙරෙනු ලබනවා.
මෙම වැටුප් වැඩිවීම අදියර කිහිපයක් යටතේ සිදුකිරීමට නියමිත බවත් ඒ අනුව මුල් ශුද්ධ වැටුප රු 5,000ක් සහ ඉතිරි මුදල 30%ක් 2025 අප්රේල් මාසයේ සිට ක්රියාත්මක කරන අතර, ඉතිරි 70% 2026 සහ 2027 වසරේ ජනවාරි මාසයේ දී සමාන කොටස්වලින් ලබාදීමට නියමිත බවත් ජනාධිපතිවරයා පැවසීය.
එබැවින් 2025 වසරේ යෝජිත වැටුප් වැඩිකිරීමට රු බිලියන 110ක් වෙන්කිරීමට නියමිතය.

