ණය පැහැර හැරීම නිසා සැලකිය යුතු ව්යාපාරික පිරිසකගේ දේපළ බැංකුවලට පවරාගෙන වෙන්දේසි කිරීමේ පරිසරයක් නිර්මාණය වී තිබීම හේතුවෙන් 1990 අංක 4 දරන බැංකු මඟින් ණය අය කර ගැනීමේ (විශේෂ විධි විධාන) පනතට සංශෝධනයක් ගෙන ඒම මඟින් දේපළ ප්රසිද්ධ වෙන්දේසියේ විකිණීම දෙසැම්බර් 15 වැනිදා දක්වා තාවකාලිකව අත්හිටුවා තිබෙනවා.
එමෙන්ම පරාටේ නීතිය අත්හිටුවීම තවදුරටත් දීර්ඝ කරන ලෙසයි කුඩා හා මධ්ය පරිමාණ ව්යවසාය අංශයට සම්බන්ධ සංගම් මඟින් ඉල්ලීම් ඉදිරිපත් කර ඇත්තේ.
පසුගිය වසර 04ක කාලය තුළ ශ්රී ලංකාව මුහුණ දුන් ආර්ථික අර්බුදය, කුඩා හා මධ්ය පරිමාණ ව්යවසාය අංශයට දැඩි ලෙස බලපා ඇති අතර, කුඩා හා මධ්ය පරිමාණ ව්යවසායකයින් විසින් බැංකු වලින් ලබා ගත් ණය පියවීමේදී දුෂ්කරතාවන්ට මුහුණ පෑමට සිදුව තිබෙනවා.
දේපළ වෙන්දේසි කිරීමට ඉඩ දීම වෙනුවට එවැනි ණය ආපසු ගෙවීම සඳහා ක්රියාකාරී සැලැස්මක් හඳුන්වා දීම මඟින් දෙපාර්ශ්වයටම සාධනීය විසඳුමක් අත්කර ගැනීම සඳහා අවශ්ය පරිසරය නිර්මාණය කිරීම වඩා සුදුසු බව රජය විසින් නිරීක්ෂණය කර තිබෙනවා.
ඒ අනුව, 2025-03-31 වැනිදා දක්වා පරාටේ නීතිය ක්රියාත්මක කිරීම අත්හිටුවීම දීර්ඝ කිරීමටත්, ශ්රී ලංකා මහ බැංකුව විසින් රාජ්ය හා පෞද්ගලික බැංකු සහ අනෙකුත් රාජ්ය ආයතන ඇතුළු සියලුම පාර්ශ්වකරුවන්ගේ සක්රීය දායකත්වයෙන් මෙම ගැටලුව විසඳීමට බහුමාන යාන්ත්රණයක් සකස් කිරීමටත් මුදල්, ක්රම සම්පාදන සහ ආර්ථික සංවර්ධන අමාත්ය වශයෙන් ජනාධිපතිවරයා ඉදිරිපත් කළ යෝජනාවයි අමාත්ය මණ්ඩලය විසින් අනුමත කර තිබෙන්නේ.

