ඉදිරියේ දී විශ්විද්‍යාලවල මානව ශාස්ත්‍ර අංශයේ ප්‍රතිසංස්කරණ රැසක්

මෙරට විශ්විද්‍යාලවල මානව ශාස්ත්‍ර අංශයේ ප්‍රතිසංස්කරණ රැසක් නුදුරේදීම සිදු කිරීමට සැළසුම් කර ඇති බව උසස් අධ්‍යාපන රාජ්‍ය අමාත්‍ය සුරේන් රාඝවන් මහතා පවසනවා.

එසේම කලාපයේ මෙන්ම ජාත්‍යයන්තරයේ සිදු කෙරෙන නව අධ්‍යාපන ප්‍රතිසංස්කරණ සම්බන්ධයෙන් පර්යේෂණ සහ අධ්‍යයනයන් සිදු කිරීමට ජාතික උසස් අධ්‍යාපන අධිකාරියක් පිහිටු වීමට ද ජනාධිපති රනිල් වික්‍රමසිංහ මහතා තීරණය කර ඇති බව අමාත්‍යවරයා අනාවරණය කරනු ලැබුවා.

‘ස්ථාවර රටකට සැවොම එක මඟකට’ මැයෙන් අද (15) ජනාධිපති මාධ්‍ය කේන්ද්‍රයේ පැවති ප්‍රවෘත්ති සාකච්ඡාවට එක්වෙමිනුයි හෙතෙම මෙම අදහස් පළ කරනු ලැබුවේ.

මේ අමාත්‍යවරයා දැක්වූ වැඩිදුර අදහස්,

“අධ්‍යාපන හා උසස් අධ්‍යාපන ක්ෂේත්‍රය සඳහා විශාල මුදලක් වෙන්කරමින් අයෝජනයක් සිදු කර තිබෙනවා. මෙරට විශ්විද්‍යාලවල මානව ශාස්ත්‍ර අංශයේ ප්‍රතිසංස්කරණ රැසක් සිදු කිරීමට අප බලාපොරාත්තු වෙනවා. ඒ සඳහා වන විශේෂ සාකච්ඡාවක් ලබන මස පැවැත්වීමට සැළසුම් කර තිබෙනවා.

ඒ වගේම කලාපයේ රටවල මෙන්ම ජාත්‍යයන්තරයේ අනෙකුත් රටවල සිදුකෙරෙන නව අධ්‍යාපන ප්‍රතිසංස්කරණ සම්බන්ධයෙන් පර්යේෂණ සහ සංවර්ධනයන් පිළිබඳව අධ්‍යයනයන් සිදු කිරීම සඳහා ජාතික උසස් අධ්‍යාපන අධිකාරියක් පිහිටු වීමට ජනාධිපති රනිල් වික්‍රමසිංහ මහතා තීරණය කර තිබෙනවා. එය 21 වන සියවසට ගැලපෙන අයුරින් සිදු කිරීමට නියමිතයි. විශ්වවිද්‍යාල පරිපාලන කටයුතු එක් තැනකට රැගෙන ඒම ද මෙහි තවත් අරමුණක් බව කිවයුතුයි.
එමෙන්ම විශ්වවිද්‍යාලවල පරිපාලන ක්‍රියාවලිය තවදුරටත් ශක්තිමත් කිරීම සඳහා උපකුලපතිවරයාට අමතරව නියෝජ්‍ය උපකුලපතිවරුන් පත් කිරීමට සැළසුම් කර තිබෙනවා. මෙරට අචාර්යවරුන් සහ මහාචාර්යවරුන් විශාල පිරිසක් විදේශ රටවලට ගොස් සිටිනවා. ඔවුන්ගේ සේවය නැවත අප ලබාගත යුතුයි. මෙරටට පැමිණ රාජ්‍ය විශ්වවිද්‍යාල තුළ ඉගැන්වීම් කටයුතු සහ පර්යේෂණ කටයුතු සිදුකරන ලෙස අප ඔවුන්ට ආරාධනා කළා. ඒ අනුව මේ වන විට ආචාර්යවරුන් කිහිපදෙනෙක් මෙරටට පැමිණ එම සේවාව ලබාදෙනවා….”