ශ්‍රී ලංකා ක්‍රිකට් නිලධාරීන් ඉවත් කිරීම සම්බන්ධයෙන් පාර්ලිමේන්තු ඡන්දයක්

ශ්‍රී ලංකා ක්‍රිකට් ආයතනයේ නිලධාරී මණ්ඩලය ඉවත් කිරීම සම්බන්ධයෙන් ඒකාබද්ධ යෝජනාවක් පාර්ලිමේන්තුවට ඉදිරිපත් කිරීමට අද පැවති පක්ෂ නායක රැස්වීමේදී තීරණය කර තිබෙනවා.

මෙම ඒකාබද්ධ යෝජනාව හෙට දිනයේ පාර්ලිමේන්තුවට ඉදිරිපත් කරන බවයි ආණ්ඩු පක්ෂයේ ප්‍රධාන සංවිධායක අමාත්‍ය ප්‍රසන්න රණතුංග මහතා සඳහන් කළේ.

ඒ අනුව අදාළ යෝජනාව යෝජනාව එදිනම විවාදයට ගෙන සවස ඡන්ද විමසීමට නියමිතයි.

හිටපු ක්‍රිකට් ක්‍රීඩක අර්ජුන රණතුංග මහතාගේ ප්‍රධානත්වයෙන් ශ්‍රී ලංකා ක්‍රිකට් ආයතනය සඳහා පත් කළ අතුරු කමිටුවේ කටයුතු ඊයේ අධිකරණ නියෝගයක් මගින් අත්හිටුවීමෙන් පසුව මෙම පියවර ගෙන තිබෙනවා.

ක්‍රිකට් පරිපාලනය තුළ සිදුවූ බව කියන මූල්‍ය අක්‍රමිකතා සම්බන්ධයෙන් විගණකාධිපතිවරයාගේ වාර්තාවේ නිර්දේශ මත පදනම්ව ක්‍රීඩා අමාත්‍ය රොෂාන් රණසිංහ විසින් ශ්‍රී ලංකා ක්‍රිකට් ආයතනය සඳහා අතුරු කමිටුව පත් කිරිමට පියවර ගනු ලැබුවා.