ස්විට්සර්ලන්තය තුල බුර්කා තහනම් කිරීමට ජනතා සහය

ස්විට්සර්ලන්ත ජනතාව, මුස්ලිම් කාන්තාවන් පළඳින බුර්කා හෝ නිකාබ් ඇතුළු හිස් ආවරණ ප්‍රසිද්ධියේ පැළඳීම තහනම් කිරීමට පක්ෂව ඡන්දය දුන්හ.

ඉරිදා (මාර්තු 07) පැවති ජනමත විචාරණයේ නිල ප්‍රතිඵලය 48.8% ට 51.2% වශයෙන් දැක්විණි.

මේ පිළිබඳ යෝජනාව ගෙන ආ දක්ෂිණාංශික ස්විස් ජනතා පක්ෂය (SVP නොඑසේනම්, Swiss People’s Party) සිය මැතිවරණ ව්‍යාපාරය තුළ “අන්තවාදය නවත්වනු” වැනි සටන් පාඨ ඉදිරිපත් කළේය.

මෙය මුස්ලිම් ජනතාවට “අඳුරු දිනයක්” වූ බව ස්විට්සර්ලන්තයේ ප්‍රමුඛ ඉස්ලාමීය කණ්ඩායමක් විසින් හඳුන්වා දෙනු ලැබිණි.

“අද තීරණය පැරණි තුවාල විවර කරන්නක්, නෛතික අසමානතාව පිළිබඳ ප්‍රතිපත්තිය තවදුරටත් පුළුල් කරන්නක් මෙන්ම බැහැර කිරීම සම්බන්ධයෙන් මුස්ලිම් සුළුතරයට යැවුණු පැහැදිලි සංඥාවක්,” යැයි සඳහන් කරමින් නිවේදනයක් නිකුත් කළ මුස්ලිම් ප්‍රජාවේ මධ්‍යම මණ්ඩලය, මෙම තීරණ අධිකරණය හමුවේ අභියෝගයට ලක්කරන බව කියා සිටියේය.

කාන්තාවන් පැළඳිය යුත්තේ කුමක්ද යන්න නිගමනය කිරීම රාජ්‍යයට අයත් කාර්යයක් නොවන බව දක්වමින් තහනමට එරෙහිව ස්විස් ආණ්ඩුව තර්ක කර තිබිණි.

ජර්මනියේ ලුසර්න් විශ්ව විද්‍යාලය කළ පර්යේෂණයකට අනුව, ස්විට්සර්ලන්තය තුළ කිසිවකු හෝ බුර්කාව නොපළඳින තරම් වන අතර කාන්තාවන් 30 දෙනෙක් පමණ නිකාබය පැළඳ සිටියහ. මිලියන 8.6ක් වන ස්විට්සර්ලන්තයේ ජනගහනයෙන් 5% ක පමණ මුස්ලිම් ජනතාවක් වෙති. ඉන් බොහෝමය තුර්කිය, බොස්නියා සහ කොසොවෝ යන රටවල සම්භවය සහිත වූවෝ වෙති.

BBC