රජය විකිරණ විද්‍යා තාක්ෂණවේදීන්ගේ සංගමය වර්ජනය තාවකාලිකව නවතයි

ඊයේ (21) උදෑසන 8ට ආරම්භ කළ වර්ජන ක්‍රියාමාර්ගය අද (22) උදෑසන 8 සිට දින 7කට තාවකාලිකව අත්හිටුවීමට රජය විකිරණ විද්‍යා තාක්ෂණවේදීන්ගේ සංගමය තීරණය කර තිබෙනවා.

මෙම ගැටලුව සම්බන්ධයෙන් ඊයේ රාත්‍රියේ සෞඛ්‍ය නියෝජ්‍ය ඇමතිවරයා සමඟ සාකච්ඡාවක් පැවැති අතර එම සාකච්ඡාවේදී මාළිඟාවත්ත වකුගඩු රෝහලේ නියෝජ්‍ය අධ්‍යක්ෂක ලෙස රාජකාරී ආවරණය කරන පුද්ගලයා විසින් සිදුකළ නීතිවිරෝධී සහ විෂමාචාරී ක්‍රියාව සම්බන්ධයෙන් මේ වන විටත් කඩිනම් විමර්ශනයක් ආරම්භ කර ඇති බවත් සතියක කාලයක් ඇතුළත සංඝමයේ ඉල්ලීම පරිදි අපක්ෂපාතී විමර්ශනයකට අවශ්‍ය වටපිටාව සකස් කිරීමට අදාල තීරණය ගන්නා බවට එකඟතාවය පළ කර ඇත.

එසේම අදාළ රෝහලේ නියෝජ්‍ය අධ්‍යක්ෂවරයාගේ ප්‍රකාශයක් උපුටා දක්වමින් සෞඛ්‍ය අමාත්‍යාංශයේ ලිපි ශීර්ෂය යටතේ නිකුත් කළ මාධ්‍ය නිවේදනය සම්බන්ධයෙන්ද කඩිනම් විමර්ශනයක් ආරම්භ කිරීමටද එකඟතාවය පළ කර ඇතැයි රජයේ විකිරණ විද්‍යා  තාක්ෂණවේදීන්ගේ සංගමය නිවේදනයක් නිකුත් කරමින් සඳහන් කරනවා.

මින් අනතුරුව රැස්වූ විකිරණ විද්‍යා තාක්ෂණවේදීන්ගේ විධායක සභාව මෙම වර්ජන ක්‍රියාමාර්ගය දින 7කට තාවකාලිකව අත්හිටුවීමටත් පොරොන්දු වූ කාලය තුළ එකඟතාවයන් ඉටු නොකළහොත් අඛණ්ඩ වැඩවර්ජනයක් ආරම්භ කිරීමටත් තීරණය කර තිබේ.

ඒ අනුව අද උදෑසන 8 සිට දිවයින පුරා රෝහල්වල විකිරණ තාක්ෂණවේදීන්ගේ සියලු සේවාවන් සාමාන්‍ය ආකාරයෙන් රෝගීන්ට ලබාගැනීමේ හැකියාව හිමි වනු ඇත.