මාරාන්තික මී උණ රෝගය මේ වනවිට හිස ඔසවමින් තිබෙන බව රිජ්වේ ආර්යා ළමා රෝහලේ ළමා රෝග පිළිබඳ විශේෂඥ වෛද්ය දීපල් පෙරේරා මහතා පවසනවා.
අද (11) පෙරවරුවේ මාධ්ය සාකච්ඡාවකට එක් වෙමින් ඔහු මේ සඳහන් කළා.
මී උණ රෝගය බොහෝ විට වැළඳෙන්නේ මඩේ බැසීම හේතුවෙන් බවයි ඔහු පවසන්නේ.
විශේෂයෙන් මෙම කාලසීමාව පාසල් නිවාඩු කාලය බවත්, ළමුන් වැඩි වශයෙන් සරුංගල් යැවීමට වෙල්යායන් කරා යෑම මෙලෙස මී උණ වැඩිවීමට ප්රධාන වශයෙන් බලපාන බවද ඔහු සඳහන් කළේය.
වෛද්ය දීපල් පෙරේරා මහතා තවදුරත් පවසා සිටියේ, උණ රෝගය දින පහක් හයක් පමණ පවතී නම් එය මී උණ රෝගය විය හැකි බවය.
ඇස් රතු පාට හෝ කහ පාට වීම, බඩ රිදීම, මුත්රා තද කහ පාටට පිටවීම මෙහි රෝග ලක්ෂණ වනවා.
මෙම මී උණ රෝගී තත්ත්වයට ප්රතිකාර තිබුණද, ප්රවේශම් විය යුතු බවත්, මෙම රෝග තත්ත්වය වකුගඩු රෝග ආසාදනය සිදුවීමට ඉඩකඩ තිබෙන බවත් වෛද්යවරයා වැඩිදුරටත් අවධාරණය කළා.

