බස්නාහිර පළාතේ ගුරු පුරප්පාඩු 4,000කට වැඩියෙන්

බස්නාහිර පළාතේ තවදුරටත් ගුරු පුරප්පාඩු 4,000කට අධික සංඛ්‍යාවක් පවතින බව පළාත් ප්‍රධාන අමාත්‍යාංශය පවසනවා.

බස්නාහිර පළාත් ප්‍රධාන ලේකම් ධම්මිකා විජේසිංහ මහත්මිය සඳහන් කළේ, ඉංග්‍රීසි, දෙමළ හා තොරතුරු තාක්ෂණය යන විෂයන්ට අදාළ ගුරු හිඟය උග්‍ර බවයි.

මීට අමතරව ඉංග්‍රීසි මාධ්‍යයෙන් විෂයන් උගන්වන ගුරු හිඟයක් පවතින බව ද ඇය සඳහන් කළා ය.

මීට පිළියමක් ලෙස යෝජනා කිහිපයක් ක්‍රියාත්මක කිරීමට පළාත් සභාවේ අවධානය යොමු කර ඇති බව ද ලේකම්වරිය පැවසුවාය.

ඒ අනුව පේරාදෙණිය හා කොළඹ විශ්වවිද්‍යාලවලින් පිට වූ අධ්‍යාපනවේදී උපාධිධාරීන් පිරිසක් ගුරු සේවයට බඳවා ගැනීමට නියමිතව තිබෙනවා.

එසේම දැනට පාසල්වල සිටින සංවර්ධන නිලධාරීන් පිරිසක් ද සුදුසුකම් මත ගුරු සේවයට බඳවා ගැනීමට සැලසුම් කර ඇති බව ප්‍රධාන ලේකම්වරිය පැවසුවාය.

පසුගිය කාලයේ පැවැත් වූ තරග විභාගයෙන් සමත්වූ උපාධිධාරීන් 3,900කට අධික සංඛ්‍යාවක් බස්නාහිර පළාත් ගුරු සේවයට බඳවා ගැණුනි.